នាយកដ្ឋានប្រឆាំងបទល្មើសបច្ចេកវិទ្យា បើកវគ្គបណ្ដុះបណ្ដាលមូលដ្ឋានគ្រឹះស្រាវជ្រាវបទល្មើសបច្ចេកវិទ្យា នៅកំពង់ស្ពឺ ដល់មន្ត្រីនគរបាលខេត្តពីរ ដើម្បីពង្រឹងសមត្ថភាពអនុវត្តច្បាប់។

ខេត្តកំពង់ស្ពឺ៖ ក្រោមការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នាយកដ្ឋានប្រឆាំងបទល្មើសបច្ចេកវិទ្យា (ន.ប.ប) បានបើកវគ្គបណ្តុះបណ្តាលដ៏សំខាន់មួយរយៈពេលពីរថ្ងៃ ស្ដីពី «មូលដ្ឋានគ្រឹះ និងវិធីសាស្ត្រស្រាវជ្រាវបទល្មើសតាមប្រព័ន្ធបច្ចេកវិទ្យា» ដល់កម្លាំងនគរបាលជំនាញនៃស្នងការដ្ឋានខេត្តកំពង់ស្ពឺ និងខេត្តតាកែវ។ វគ្គសិក្សានេះដឹកនាំដោយផ្ទាល់ពីលោក ឧត្តមសេនីយ៍ត្រី ឃួន សុពិសិដ្ឋ តំណាងលោក ឧត្តមសេនីយ៍ទោ សុខ នីត្យា ប្រធាននាយកដ្ឋានប្រឆាំងបទល្មើសបច្ចេកវិទ្យា ក្នុងគោលបំណងបំពាក់បន្ថែមនូវចំណេះដឹង និងជំនាញបច្ចេកទេសជាក់ស្ដែងដល់មន្ត្រីអនុវត្តច្បាប់នៅតាមមូលដ្ឋាន ដើម្បីបង្កើនប្រសិទ្ធភាពក្នុងការទប់ស្កាត់ និងបង្ក្រាបបទល្មើសសម័យឌីជីថលដែលកំពុងកើនឡើង។

នាថ្ងៃទី២៨ ខែមករា ឆ្នាំ២០២៦ នៅសាលប្រជុំនៃស្នងការដ្ឋាននគរបាលខេត្តកំពង់ស្ពឺ ពិធីបើកវគ្គបណ្តុះបណ្តាលដ៏ចាំបាច់មួយត្រូវបានរៀបចំឡើង ក្រោមអធិបតីភាពលោក ឧត្តមសេនីយ៍ត្រី ញ៉ែម សៅ តំណាងដ៏ខ្ពង់ខ្ពស់លោក ស្នងការនៃស្នងការដ្ឋាននគរបាលខេត្តកំពង់ស្ពឺ។ វគ្គសិក្សានេះ គឺជាគំនិតផ្តួចផ្តើមដ៏សំខាន់មួយរបស់អគ្គស្នងការដ្ឋាននគរបាលជាតិ ដែលទទួលស្គាល់ពីភាពចាំបាច់ក្នុងការលើកកម្ពស់សមត្ថភាពមន្ត្រីនគរបាល ឲ្យស្របទៅនឹងការរីកចម្រើននៃបច្ចេកវិទ្យា និងការប្រែប្រួលនៃទម្រង់បទល្មើស។

វគ្គបណ្តុះបណ្តាលនេះ បានប្រមូលផ្តុំសិក្ខាកាមសរុបចំនួន ៥០រូប ក្នុងនោះមាននារីចំនួន ០៤នាក់ ដែលសុទ្ធសឹងតែជាថ្នាក់ដឹកនាំ និងមន្ត្រីជំនាញសំខាន់ៗ រួមមាន៖ នាយ នាយរងការិយាល័យ នាយ និងនាយរងផ្នែកជំនាញប្រឆាំងបទល្មើសបច្ចេកវិទ្យា ព្រមទាំងលោក អធិការ និងអធិការរងនគរបាលក្រុង-ស្រុក នៃស្នងការដ្ឋាននគរបាលខេត្តកំពង់ស្ពឺ និងខេត្តតាកែវ។

ក្នុងឱកាសនោះ លោក ឧត្តមសេនីយ៍ត្រី ឃួន សុពិសិដ្ឋ បានសង្កត់ធ្ងន់ពីសារៈសំខាន់ជាយុទ្ធសាស្ត្រនៃវគ្គសិក្សារយៈពេលពីរថ្ងៃនេះ។ លោកបានបញ្ជាក់ថា ៖ «ការរីកចម្រើនយ៉ាងឆាប់រហ័សនៃប្រព័ន្ធបច្ចេកវិទ្យា បានតម្រូវឲ្យកម្លាំងនគរបាលទាំងអស់ ជាពិសេសនគរបាលយុត្តិធម៌ ត្រូវតែមានមូលដ្ឋានគ្រឹះរឹងមាំក្នុងការស្រាវជ្រាវ និងវិភាគទិន្នន័យឌីជីថល ដើម្បីឈានទៅដល់ការកំណត់មុខសញ្ញា និងប្រមូលភស្តុតាងតាមបែបវិទ្យាសាស្ត្រ និងស្របតាមនីតិវិធីច្បាប់»។

លោក ឧត្តមសេនីយ៍ត្រី ញ៉ែម សៅ ក៏បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងនាយកដ្ឋានប្រឆាំងបទល្មើសបច្ចេកវិទ្យា ដែលបានយកចិត្តទុកដាក់ និងគាំទ្រដល់ការពង្រឹងសមត្ថភាពមន្ត្រីនគរបាលនៅតាមបណ្តាខេត្ត ក្នុងកិច្ចការពារសុវត្ថិភាពសង្គម និងការអនុវត្តច្បាប់ឲ្យកាន់តែមានប្រសិទ្ធភាព។

វគ្គសិក្សានេះនឹងបង្រៀនអំពីគោលការណ៍ច្បាប់ពាក់ព័ន្ធនឹងបច្ចេកវិទ្យា វិធីសាស្ត្រប្រមូលនិងថែរក្សាភស្តុតាងឌីជីថល (Digital Forensics) និងបច្ចេកទេសតាមដានក្រុមឧក្រិដ្ឋជនតាមប្រព័ន្ធអ៊ីនធឺណិត។ តាមរយៈការបណ្តុះបណ្តាលនេះ គេរំពឹងថា មន្ត្រីនគរបាលដែលជាសិក្ខាកាមទាំងអស់ នឹងអាចយកចំណេះដឹងថ្មីទៅអនុវត្តនៅតាមមូលដ្ឋានរបស់ខ្លួន ដើម្បីរួមចំណែកដល់ការកាត់បន្ថយ និងបង្ក្រាបបទល្មើសបច្ចេកវិទ្យាគ្រប់ទម្រង់ដូចជា ការឆបោកតាមអនឡាញ ការលួចទិន្នន័យ និងបទល្មើសបំពានផ្លូវភេទលើកុមារតាមប្រព័ន្ធអ៊ីនធឺណិត ជាដើម ស្របតាមទិសស្លោករបស់ក្រសួងមហាផ្ទៃ និងរាជរដ្ឋាភិបាល។