មជ្ឈដ្ឋាននានាសង្ស័យ៖ ម្ចាស់រោងសន្ធិជន្លង់ម្រេចនៅស្រុកមេមត់ រងការចោទប្រកាន់ថាប្រើប្រាស់លេសចែកចាយក្នុងស្រុក ដើម្បីលួចឆ្មក់ដឹកផលអនុផលព្រៃឈើទៅប្រទេសវៀតណាម

អង្គហេតុដែលនាំឱ្យមានការសង្ស័យរួមមាន៖

• ប្រភព និងការដឹកជញ្ជូន៖ ក្រុមដដែលនេះបានប្រើប្រាស់លិខិតអនុញ្ញាត (ប៉េសេ) ចេញដោយរដ្ឋបាលព្រៃឈើខេត្តស្ទឹងត្រែង ដើម្បីដឹកជញ្ជូនជន្លង់ម្រេចតាមរថយន្តវេអងធំៗ យកមកទម្លាក់នៅដេប៉ូក្នុងភូមិជីប៉េះ។
• ការបំប្លែងមធ្យោបាយ៖ ក្រោយពេលទម្លាក់នៅដេប៉ូ ជន្លង់ទាំងនោះត្រូវបានគេលើកដាក់លើ រថយន្តកែច្នៃ (បុកសឺរ) និងគោយន្តកែច្នៃ រួចយកទៅលាក់ទុកនៅទីតាំងសុវត្ថិភាព ដើម្បីរង់ចាំឱកាសយប់ស្ងាត់ ដឹកជញ្ជូនឆ្លងដែនទៅកាន់ប្រទេសវៀតណាម។
• ការផ្ទុយពីលិខិតអនុញ្ញាត៖ ទោះបីជាលោក ថេត សង្ហា មានលិខិតអនុញ្ញាតបង្កើតរោងសន្ធិលក់ចែកចាយផល អនុផលព្រៃឈើ ចេញដោយមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ កាលពីថ្ងៃទី ០៩ ខែកុម្ភៈ ឆ្នាំ២០២៦ (តាមការអះអាង) ក៏ដោយ ប៉ុន្តែជាក់ស្តែងគេពុំដែលឃើញមានការចែកចាយដល់កសិករក្នុងស្រុកដូចការអះអាងនោះឡើយ។

ករណីនេះបានធ្វើឱ្យមជ្ឈដ្ឋានជុំវិញដាក់សំណួរទៅកាន់ មន្ត្រីជំនាញរដ្ឋបាលព្រៃឈើ និងសមត្ថកិច្ចការពារព្រំដែន ពាក់ព័ន្ធថា តើមានការបណ្តែតបណ្តោយ ឬមានអាថ៌កំបាំងណាមួយនៅពីក្រោយសកម្មភាពដឹកជញ្ជូនជន្លង់ម្រេចទៅក្រៅប្រទេសដោយគ្មានលិខិតអនុញ្ញាតត្រឹមត្រូវនេះដែរឬទេ? ព្រោះកន្លងមកពុំដែលឃើញមានវិធានការបង្ក្រាបចំពោះបុគ្គលទាំងនេះម្តងណាឡើយ។